BAGUIO CITY – Maar-aramat ita ti dua pulo ket dua (22) a Canine (K9) Unit iti nagduduma nga opisina ti pulisya iti rehiyon Cordillera.
Pakairamanan daytoy ti sangapulo ket dua (12) nga explosives detection dogs, dua (2) a search and rescue dogs, maysa a combat tracking dog, ken pito (7) a narcotics detection dogs.
Sigun kenni Police Major Errol Longtoy, Officer-In-Charge iti Regional Explosive Ordnance Disposal and Canine Unit, kaadwan kadagiti pilpilyenda a Canine Unit ket Belgian Malinois gapu iti kinaalibtak ken iti stamina dagitoy.
Innayon ni PMaj. Longtoy a sakbay a naipaima kadakuada dagiti nasao a klase ti aso ket immunan a nasanay dagitoy iti national headquarters.
Mainaig iti dayta, pito agingga sangapulo a tawen laeng ti manamnama a panagserbi dagiti Canine Unit nu sadino kalpasan nga agretiro dagitoy ken mabalindan a maipaampon.
Malaksid kadagiti Canine Units, kinuna ni PMaj. Longtoy nga adda metlaeng ti naipaay a bomb suit kadakuada.
Nupay kasta, awan pay ti naipaay iti rehiyon nga explosive ordnance disposal robot gapu ta naipangruna a naipaayan ti National Capital Region ken dagiti paset ti Mindanao kasaruno paylaeng ti adu nga insidente ti panagbettak sadiay.//Bombo Rob Dominguez
