MYAWADDY, MYANMAR – Naispal ti dua pulo ket uppat a Pilipino a nagtrabaho iti Chinese scam companies sadiay Myawaddy, Myanmar idi kalman, Abril 21.
Daytoy ket babaen iti nagtinnulong a puersa ti PH Embassy Police Attaché babaen iti panangidaulo ni Colonel Dominador Matalang, International NGOs ken kadagiti Thailand authorities.
Babaen iti naipatungpal a rescue operation, naispal dagiti human trafficking victim ken personal a naduktalan da ti panangipalubos ti employer ti maatap nga scam hub idi Dong Feng Park wenno KK2 Park sadiay Myawaddy.
Iti agdama, ur-urayen dagiti biktima a Pinoy ti panakaiproseso ti repatriation dagitoy nga agsubli ditoy pagilian.
Kabayatanna, kinuna ni Matalang a dagiti naispal a Pilipino ket karaman iti nasurok sangagasut a Pilipino a na-trap iti Myawaddy iti gubat iti nagbaetan ti Myanmar army ken Karen National Union ken allied forces idi Abril 20.
