Karaman ti duapulo ket walo a Cordilleran iti 208 a miyembro iti Philippine National Police Academy MASIDTALAK wenno Maaasahang Tagapagsilbi ng Inang Bayan na may Dangal at Katapatan na ang Layunin ay Kapayapaan Class of 2023 iti graduation day-da idi kalman idiay Camp General Mariano Castañeda iti Silang, Cavite.
Naawat ni Norman Asing Luis manipud Kapangan, Benguet ti NAPOLCOM Kampilan Award para iti panangipakitana iti superior a kalidad iti napapateg a responsibilidadna kas president iti klaseda.
Innem ti agtaud iti Benguet, tallo manipud Baguio City, tallo iti Ifugao, innem iti Kalinga, pito iti Mountain Province, dua manipud Abra, ken maysa iti Apayao.
Kadagiti 208 a naggradwar, 186 ti sumali iti Philippine National Police, 11 ti agserbi iti sidong iti Bureau of Fire Protection, ken 11 iti Bureau of Jail Management and Penology.
Kabayatanna, nagkiddaw ni President Ferdinand Marcos Jr. kadagiti nagturpos a kadete nga agserbida a dana tapnu maisubli ken mapagtalinaed ti talek iti publiko iti pulisya, ken ilabanda ti kappia ken karbengan dagiti tattao.
