BAGUIO CITY – Impasigurado dagiti dua nga ama ti Mountain Province ti panangdaer ti probinsiada iti agdama a krisis nga ituntunda ti COVID-19 pandemic ken iti kaawan ti matay sadiay gapu iti bisin kagiddan ti manarimaan nga enhanced community quarantine.
Gapu iti daytoy, inyusuat ti provincial government ken ti Office of the Congressman ti Montañosa ti ‘East-to-West, West-to-East’ agri-scheme para iti panaggaraw dagiti produkto dagiti munisipyo sadiay.
Indauluan da Governor Bonifacio Lacwasan Jr. ken Congressman Maximo Dalog Jr. ti panaggatang iti dumanon 66 a tonelada ti nagduduma a nateng ken prutas ken dagitoy ket naiwaras iti nagduduma nga ili sadiay.
Sagudayen ti ‘East-to-West, West-to-East’ agri-scheme a dagiti nateng a kangrunaan a produkto dagiti munisipyo iti laud a paset ti Mountain Province ket maiturong kadagiti non-vegetable producing municipalities ti probinsia.
Maiturong met dagiti saba a kangrunaan a produkto dagiti munisipyo iti daya a paset ti Mountain Province kadagiti non-banana-producing municipalities ti probinsia.
Agtultuloy met ti panakagatang dagiti produkto dagiti mannalon iti nasao nga agri-scheme.
Sigun kenni Erlindo Agwilang manipud iti Office of the Congressman ti Montañosa, babaen iti nasao nga scheme ket maipasigurado ti saan a panagbisin dagiti umili ti probinsia ken saan a nakaro a maapektaran ti pagbiagan ti agricultural sector sadiay.
