BAGUIO CITY – Agtalinaed dagiti quarantine checkpoints nga isaysayangkat dagiti barangay officials sadiay Pinget Barangay ditoy siudad ti Baguio iti baet a winaswasen ni Mayor Benjamin Magalong ti indeklarana a total lockdown iti nasao a barangay.
Sigun kenni Pinget Punong Barangay Pablo Pawi Jr., kalpasan a nawaswas ti total lockdown ti barangayda ket na-pull-out metten dagiti pulis a nakabantay kadagiti amin a checkpoints dagitoy.
Nupay kasta, kinunana nga ituloyda latta ti nainget a panangwanawan kadagiti bumarangayda nangruna dagiti rumrumwar sadiay tapnu maipasigurado iti panagtulnog dagitoy kadagiti protocols.
Maipalagip a naipasidong iti barangay lockdown ti Pinget gapu iti saanda a panangsurot kadagiti pagalagadan ti Enhanced Community Quarantine.
Kagiddan iti daytoy, naiyapela ti agtultuloy a panangtulnog dagiti residente ti Pinget kadagiti pagaladagan ken kadagiti barangay officials iti panangimplementarda kadagiti pagalagadan ti Enhanced Community Quarantine tapnu saan a maulit ti panakaipasidong dagitoy iti lockdown.
Kabayatanna, immapela metlang ni Punong Barangay Pawi kadagiti saan pay a nakaawat iti relief goods dagitoy iti panag-urayda.
Inlawlawagna a dagiti relief forms nga inpapirma dagitoy ket ipaimada pay iti social worker sakbay a maipay dagiti relief goods.
Gapu iti dayta, kinunana nga agurayda iti maiwaras kadakuada gaputa posible a naikarga ti nagan dagitoy iti maikadua wenno maikatlo a batch ti relief distribution.
