![](https://img.bomboradyo.com/baguio/2021/07/Allan-Jay-Yumul.jpg)
BAGUIO CITY – Sumangsangon iti kaso a panaglabsing iti RA 9165 wenno iti Comprehensive Dangerous Drugs Act of 2002 ti maysa nga estudyante kalpasan a natiliw gapu iti panangipuslitna ti marijuana sadiay Ileb, Nambaran, Tabuk City, Kalinga idi kalman.
Nabigbig daytoy a ni Allan Jay Yumul, 22-anyos ken residente ti Purok 7, Rosario, Santiago City.
Maibasar iti report, nakaawat iti impormasyon dagiti operatiba ti Rizal Municipal Police Station mainaig iti lalaki a naka-bisikleta a mangibiahe iti marijuana manipud sadiay Tabuk City.
Dagus a nangisayangkat dagiti otoridad iti checkpoint operation a nangitunda iti panakasitar ni Yumul.
Nakumpiskar kenkuana ti tallo a pidaso ti marijuana bricks ken dua a bond paper a naglaon ti napagango a bulbulong ti marijuana nga agdagsen ti agarup nasurok tallo a kilo ken aggatad ti P360,000.
Iti imbestigasyon dagiti pulis, inaklon ni Yumul a daytoy ti maikadua a gundaway a panagturongna sadiay Kalinga tapnu agala ti iligal a droga.
Naduktalan pay a naibaon laeng ti nasao nga estudyante a mangala kadagiti nasao nga iligal a droga sadiay Kalinga.