Isaksakad ita Senator Erwin Tulfo ti maysa a gakat a mangisingsingasing nga aramiden a libre dagiti kangrunaan a professional licensure examinations para kadagiti kwalipikado a Pilipino ngem adda kadagiti vulnerable sector.
Daytoy ket kas paset iti addang tapno adadda a mapalawa pay ti access iti propesyonal a trabaho ket makissayan ti underemployment iti pagilian.
Iti sidung ti Senate Bill No. 2035 wenno ti “Free Professional Examinations Act” , saanen a masingir ti examination fees dagiti kwalipikado nga indigent examinees para iti borad, civil service, ken bar examinations.
Sigun gamin kenni Senator Erwin Tulfo, addu kadagiti Pilipino a nakaleppas ti panagadalna ti saan a nangituloy iti panangalada iti lisensya gapu iti kinakurang ti pagbayad kadagiti examination fees, isu’t gapunna a mapilitan dagitoy a sumrek iti trabaho a saanda pay a naragragpat ti propesyonal a kwalipikasyon.
“Maraming kababayan natin ang nakakapagtapos pero hindi na nakakapag-exam dahil sa gastos. Sa halip na makuha ang lisensya, napipilitan silang magtrabaho agad—kadalasan sa mas mababang antas ng trabaho,” sigun kenni Senator Tulfo.
Nu kasbilang maipasa, saklawen daytoy ti Professional Regulation Commission (PRC) Board Examinations, Civil Service Commission (CSC) Eligibility Examinations, ken Bar Examinations nga idadauloan ti Korte Suprema.
Iti sidung ti nasao a gakat, ti Department of Social Welfare and Development (DSWD) ti nadutokan a mangbigbig nu kwalipikado ti maysa nga indigent sakbay a mangi-isyu dagitoy iti sertipikasyon a maipresenta idiay PRC, CSC, wenno Korte Suprema kas basaran ti exemption dagitoy.
Tapno maliklikan ti panangabuso iti nasao a benepisyo, malimitaran ti panagaramat iti daytoy iti maysa a gundaway tunggal tawen laeng para iti maysa nga aplikante. //bombokaren.c.sapirao
