BAGUIO CITY – Nagun-od ti dadaulo ti Police Regional Office Cordillera (PROCOR) ti umuna a puesto iti Individual Commander’s Evaluation Rating (ICER) para idi bulan ti Oktubre ti agdama a tawen.
Indauluan ni PBGen. R’Win Pagkalinawan ti nasao a listaan manipud iti 17 a regional directors iti intero a pagilian.
Kinuna ti PNP Directorate for Plans a nakaala ni Pagkalinawan iti 93.08 percent nga overall rating.
Bukbuklen ti nasao a rating ti Unit Performance Evaluation Rating (UPER) a 60%, Directorial Staff (D-Staff) Aptitude Rating a 25% ken Focus Directives a 15%.
Kabayatan ti panagtakem ni Pagkalinawan manipud idi Pebrero ti agdama a tawen, nagtalinaed ti PROCOR kas kangrunaan no maipapan iti law enforcement, panangliklik iti krimen ken ti pannakaipaay ti seguridad iti publiko iti Cordillera.
Maipalagip a nagun-od ti PROCOR ti maikapat a kangatuan nga ICER idi Agosto a katukad ti 91.98 percent ken maikatlo a kangatuan nga ICER a katukad ti 92.55 percent idi Setiembre.
