Nangipila ni Benguet Congressman Eric Go Yap iti gakat a mangprotektar kadagiti freelancers manipod iti labor violations.
Impila ni Yap iti Kamara ti House Bill No. 2856 wenno ti Freelance Workers Protection Act.
Karaman iti probisyon daytoy ti rumbeng a panakaadda iti kontrata iti nagbaetan dagiti freelancers ken dagiti kliyente dagitoy nu sadino, kasapulan metlaeng a nalawag a nakalanad ti terms of work, payment ken deadlines tapno maliklikan ti saan a panagkinnaawatan dagiti maseknan.
Sigun kenni Yap, naobserbaran a makapaspasar dagiti freelancers iti saan a patas a panakatrato ken saan a nalawag a work agreements.
Innayonna a nu awan iti ligal a nakaibasaran tapno maprotektaran dagiti freelancers a kas kadagiti regular nga empleyado, agtultuloy a mapasaranda dagiti parikut a kas iti maitantantan a panagsahod, saan a patas a tax practices, ken kinaawan iti benepisyo kas iti paid leave.
Sumagmamano kadagiti kadawyan a freelancers dagiti graphic designers, mannurat, virtual assistants, ken dagiti programmers.
Malaksid iti dayta, panggep pay ti nasao a gakat a maipaayan dagiti freelancers iti kanayonan a benepisyo kas iti hazard pay ken night differential.
Iti bileg daytoy, manamnama a maipaayan met iti pannusa dagiti aglabsing wenno dagiti saan nga agtulnog iti nakalanad iti kontrata.
Daytoy ket tapno mapasayaat ti kasasaad wenno agbalin nga ad-adda nga ethical ti freelance market iti pagilian para kadagiti mangmangged a mangayat iti flexible a wagas iti panagtrabaho.
