Naituding inton Setiembre a nuebe agingga Disiembre ti pannakaipatungpal ti garbage collection scheme iti uppat a barangay iti siudad ti Baguio.
Daytoy ket paset ti agtultuloy a panangpapintas ti solid waste management system iti Baguio City.
Babaen iti naipaulog a memorandum number 111, series of 2024, naibilin iti uppat a barangay a pakairamanan ti Barangay Bakakeng Central, Irisan, Guisad Surong ken Gibraltar a pagsinaen dagiti recyclable materilas a mabalin a mailako kadagiti junkshops ken dagiti “residual waste” a maibelleng met iti City’s Material Recovery Facility.
Daytoy ket nakabasar iti Republic Act 9003, section 10 wenno solid waste management act of 2000 nu sadinno, nakalanad a ti solid waste segregation ket maisaysayangkat iti barangay lebel bayat a ti panagkolektar kadagiti non-recyclables ken special waste ket maisaysayangkat met iti lokal a gobierno.
Sigun kenni Eugene Buyucan, Department Head ti General Services Office, nasaysayaat ti nasao a wagas ken naparpartak ti wagasda a mangala ti basura gaputa saandan nga agkalkal pay ti basura.
Innayon ti opisial a babaen ti nasayaat a pannakaipatungpal ti nasao a wagas, dakkel ti “matipid” ti siudad ken ad-adda a basbassit ti makolektar a basura iti biang dagiti kameng ti General Services Office.
