Inkari ti Armed Forces of the Philippines(AFP) a kamatenda dagiti nang-ambush ken nangpapatay kadagiti uppat a suldado idiay Lanao del Norte idi January 23.
Kagiddan dayta, impeksa ti pwersa militar ti pagilian ti panakipagladingitda iti pamilya dagiti pimmusay a soldado ken impanamnamada ti panakaipaay ti tulong kadagitoy.
Immunan a kinuna ti Philippine Army a maatap a miembro iti terorista a grupo a Dawlah Islamiyah ti adda iti likudan ti insidente.
Napasamak daytoy bayat a nangisayangkat dagiti nasao a tropa iti non-combat activities.
Sigun kenni Army 2nd Mechanized Infantry Brigade spokesperson Captain Anton Cortes, rimwar dagiti nasao a tropa manipod iti kampo tapno gumatang kadagiti kasapulanda.
Kabayatan ti panagdalyasatda iti maysa a karayan, sinalangad ida dagiti armado nga indibidwal nu sadino, sigun kenni Cortes,napasamak ti ambush pasado alas diez iti agsapa ti nasao nga aldaw.
Dagus met a naideploy ti medikal a tulong, panakasecure ti nasao a lugar ken panakastabilize ti sitwasyon.
Dagiti pimmusay a soldado ket pakairamanan da SSg. Diosito Araya, Sgt. Gilbert Arnoza, Sgt. Junel Calgas, ken Pvt. Sean Mark Laniton a miembro iti Task Force Tabang (Help) a mangipapaay ti civil-military a panagserbi kadagiti nasulinek a luglugar iti Munsipyo ti Munai a paggaammo a nakaro a naimpluwensyaan dagiti militante.
