BAGUIO CITY – Naipa-iman iti Municipal Social Welfare and Development dagiti grupo ti menor de edad a nangkamat ken nangbugbog iti maysa a lalaki sadiay La Trinidad Trading post area, Pico, La Trinidad Benguet idi parbangon ti May 24, 2022.
Iti interview ti Bombo Radyo Baguio kenni PLT. Angeline Hombrebueno, dadaulo ti Womens & Childrens Protection Desk ti La Trinidad MPS, kinunana a nabigbig ken natiliw dagiti ubbing babaen ti tulong ti CCTV footage iti napasamakan ti insidente.
Sigun kenkuana agtawen iti 13 ti kaubingan a iti grupo ken kaadoan kadagitoy ket agnanaed sadiay La Trinidad bayat a manipod Nueva Ecija ken Pangasinan ti maysa nga 13 ken 15 anyos.
Binigbigna met ti biktima ti napasamak iti insidente a ni Salvador Lantuyen-41 anyos, maysa a mannalon manipod Buguias, Benguet.
Inlawlawagna met a nupay naglabsing dagiti ubbing iti pagalagadan ti curfew hours ken ti panagdangran ti biktima, akem pay ti MSWD a mangipaay ti kaskenan nga interventions gaputa dagitoy ket menor de edad.
Gapu met iti nasao nga insidente, umap-apela daytoy kadagiti nagannak ken guardians a bantayanda dagiti annakda ken amoenda dagiti grupo wenno barkada dagitoy tapnu mailiklikda kadagiti dakes nga impluwensia ken panakapasamak dagiti insidente.
