Inyunay-unay ti Department of Health – Cordillera a nu makarikna kadagiti sintomas ti Mpox ket dagus nga agpakonsulta iti kaasitgan nga ospital.
Kasaruno daytoy ti kumpirmasyon ti City Health Services Office a nakailistan ti Baguio City iti dua a kaso ti Mpox babaen iti 28-anyos ken 22-anyos, agpada a lalaki.
Karaman kadagiti common symptoms ti Mpox ket ti skin rash wenno mucosal lesions, fever, swollen lymph nodes ken sore throat, muscle aches ken body pain, headache ken low energy.
Inlawlawag met ni Dr. Celia Flor Brillantes, dadaulo ti City Health Services Office a saan a rumbeng nga agpanic dagiti tattao gapu ta ti Mpox ket saan a kas iti COVID-19 a nalaka a maiyakar.
Sigun kenni Dr. Brillantes, maiyakar laeng ti Mpox babaen iti close contact activities kas iti panag-ungo (kissing), panag-arakup (hugging) ken intimate sexual contact kadagiti indibidual a positibo iti nasao a sakit.
Mabalin metlaeng a maiyakar ti Mpox babaen kadagiti kontaminado a banag kas iti bado, utensils ken kadagiti naimpektaran nga ayop.
Gapu iti daytoy, impetteng ni Brillantes a sukimaten ti kondisyon ti partner nu adda ti sintomas ti Mpox sakbay ti aniaman a close contact kenkuana.
Innayonna a regular nga agusan ti ima, agusar ti face mask ken obserbaran ti physical distancing nu adda kadagiti ado a tattao.
Immuna metten a naipakaammo a dagiti dua a kaso ket addan iti nasayaat a kasasaad ken nakaquarantine metten dagiti nakapulapol dagitoy.
