BAGUIO CITY – Impaima ti Department of Agriculture (DA)-Cordillera ti tulong pinansial kadagiti agtartaraken ti baboy sadiay Tabuk City, Kalinga a naapektaran iti African Swine Fever (ASF).
Sigun kenni Tabuk City Assistant City Veterinarian Dr. Carmen Wanas, 31 nga agtartaraken ti baboy manipud iti walo a barangay, partikular ti Malalao, Agbannawag, Tuga, Cabaritan, Lucog, San Julian, Bagumbayan ken Bulanao ti nabigbigda a benipisaryo ti nasao a tulong.
Kinunana nga amin dagiti taraken dagiti benipisaryo ket naipasidong iti depopulation wenno panagpatay tapnu malapdan ti ad-adda a panakaiwaras ti ASF sadiay.
Nadiskwalipikar met iti nasao a tulong dagiti naglabsing kadagiti paglintegan iti umno a panakaiproseso dagiti baboy a naimpeksion ti ASF.
Immuna metten a dinakamat ni Dr. Wanas a 153 a baboy ti napatay idi napalabas a tawen gapu iti ASF sadiay Tabuk City ken tunggal napatay a baboy ket bayadan ti DA iti P5,000.
Kabayatanna, dinakamat met ni Dr. Karl Glenn Kigis manipud iti Regulatory Division ti DA-Cordillera a sumaruno a makaawat iti kapada a tulong pinansial dagiti apektado nga agtartaraken ti baboy sadiay Balbalan, Pinukpuk ken Rizal.
