BAGUIO CITY – Agtultuloy ti hot pursuit operation dagiti otoridad sadiay sitio Likew, Namal, Asipulo, Ifugao tapnu makemmeg dagiti rebelde a naglibas kalpasan ti napasamak nga ingkwentro iti nagbaetanda iti pwersa ti gobierno idi kalman.
Iti report ti 54th Infantry Battalion (IB), naduktalanda ti hideout dagiti maatap a miembro ti New Peoples Army idi kalman, May 23, 2022 kalpasan ti 20 a minutos a panakirinupakda iti tropa ken grupo ti Guerilla Front-Abra, Mt. Province, Ilocos Sur (WGS-AMPIS).
Awan met ti naipadamag a nadangran iti pwersa ti gobierno bayat a nakalibbas dagiti rebelde a grupo, pakairamanan dagiti nadangran a miembro dagitoy.
Narekober iti nasao a disso ti uppat nga Anti-Personnel Mines (APM) nga addaan iti 40-meter wire; 20 a pidaso ti blasting caps; medical kit , nagduduma nga dokumento ken kagaawan dagiti rebelde a grupo.
