Nagbotos ti House Committee on Justice a saanda a luktan ti kahon a naglaon iti income tax returns (ITR) da Vice President Sara Duterte ken ti asawana a ni Atty. Manases Carpio.
Iti panagbotos, 38 a mammanday-linteg ti nagkedked iti panaglukat bayat nga innem ti immanamong.
Insubmitir iti Bureau of Internal Revenue (BIR) ti kahon iti komite ngem nalapdan iti panangilukat iti daytoy, ken naipaganetget a rumbeng daytoy nga aramiden iti executive session ken saan nga iti public hearing.
Sigun kenni Deputy Minority Leader Chel Diokno, saanen a kasapulan a luktan ti ITR iti agdama gaputa umdas ti mapapati nga ebidensia para iti probable cause, ken nasaysayaat nga ipaay ti nasao a banag.
Sinuportaran daytoy da Iloilo Rep. Janette Garin ken Manila Rep. Benny Abante, a nangibaga a ti ITR ket ad-adda a nasaysayaat a pagsaritaan iti impeachment trial iti Senador ken saan nga iti agdama a komite.
Ngem adda ti saan nga immanamong iti desision. Sigun kenni Iloilo Rep. Nonoy Defensor, ti saan a panaglukat kadagiti dokumento ket mabalin a maibilang a panagtalikod iti “public trust,” nga inyarigna kadagiti immuna nga impeachment controversies iti pagilian.
Kabayatanna, kinuna ni Congressman Leila de Lima a rumbeng nga agturay ti Konstitusion ngem iti dadduma a linteg, ken impaganetgetna a ti kinapudno ket maimatangan laeng babaen iti panagsukimat kadagiti dokumento.
Sinuportaran met iti Tingog party-list a ni Congressman Jude Acidre ti panaglukat kadagiti rekord, ngem impaganetgetna a daytoy ket para iti panangilawlawag iti kinapudno ken panangisubli iti talek iti publiko.
