BAGUIO CITY – Naobserbaran dagiti Data Analysist ti Contact Tracing ti Baguio a pimmartak ti household transmission wenno panakaiyakar ti COVID-19 kadagiti uneg ti babbalay ditoy siudad.
Inaklon daytoy ni Baguio City Contact Tracing Data Analysist PNP-NUP Mishelle Junio iti interview ti Bombo Radyo Baguio.
Inlawlawagna a ninamnamadan ti killaat a panagngato ti bilang dagiti mailista a kaso ti COVID-19 iti siudad ita nga Enero kasaruno iti holiday season.
Kinunana a nakitada iti datos a kaaduan kadagiti kaso a nairekord ditoy siudad ket babaen iti household transmission.
Kabayatanna, inaklonna metlaeng nga agtaltalinaed a karit kadakuada ti panangipatungpalda ti contact tracing kadagiti second generation contacts a nakapolapol dagiti nagpositibo iti COVID-19.
Sigun kenni Junio, naobserbaranda nga iyaleng-aleng dagiti pasyente ti panangipaay ti impormasyon seknan iti second level ken third level a close contacts dagitoy.
Gapu iti daytoy, impettengna a napateg unay ti panangipaay ti impormasyon dagiti nasao a lebel ti close contacts dagiti pasyente gaputa adda latta ti posibilidad a makaptanda iti coronavirus.
Naamuan a dumanon iti 70 ti contact tracers manipod DILG ken 50 manipod PNP ti nagsubli ken naiwaras manen ditoy syudad para iti contact tracing.
