BAGUIO CITY – Nadutukan kas baro a dadaulo ti Regional Highway Patrol Unit (RHPU) – Cordillera ti Igorota police officer manipud Kibungan, Benguet.
Daytoy ket ni PLTCOL KIMBERLY ESTEBAN MOLITAS, ti kaunaan a babai nga opisyal a nagbalin a dadaulo ti RHPU-Cordillera.
Sinukatanna ni PLt.Col. Joe Wilson Denamarca kalpasan ti panagserbina kas dadaulo ti Police Community Relations ti Highway Patrol Group – Headquarters sadiay Camp Crame.
Nagserbi pay daytoy kas dadaulo ti Public Information Office ti National Capital Region Police Office ken naipatulod sadiay ballasiw taaw tapnu agserbi iti United Nations’ Stabilization Mission sadiay Haiti.
Nagturpos ni PLt.Col. Molitas iti PNPA iti MAGILAS Class of 2000 ken nabigbig daytoy kas maysa kadagiti “12 Emerging Leaders of Asia” ti Asia Foundation idi 2016.
Ti multi-awarded lady officer ket anak ni Kibungan, Benguet Mayor Cesar Molitas.
