Naipaayen ti imbitasyon kenni sigud a President Rodrigo Duterte a makipaset iti hearing iti House Quad Committee (QuadComm) inton bigat seknan iti extrajudicial killings kabayatan ti administrasyon daytoy, sigun iti Philippine National Police ita nga aldaw.
Sigun kenni Philippine National Police spokesperson Police Colonel Jean Fajardo, adda ti naawatda a ladawan a mangpakpakita a naawat ti sigud a presidente ti imbitasyon babaen iti representativena.
Kinuna ni Fajardo nga imbilin ni Surigao del Norte Representative Robert Ace Barbers iti Criminal Investigation and Detection Group ti panakaipasigurado a maawat ni Duterte ti imbitasyon.
Maibasar iti surat, maimbitaran ni Duterte tapno mangipaay iti sungbat kadagiti ado a damag seknan iti napalabas nga administrasyonna.
Immunan met nga inyebkas ni Duterte a silulukat daytoy a mang-atendar iti hearing nu daytoy ket maipaayan iti imbitasyon.
