![](https://img.bomboradyo.com/baguio/2021/02/session-road-baguio-city-ARO-Order-8.jpg)
BAGUIO CITY – Nainget latta ti panagrikus dagiti opisyales ti Session-Governor Pack Road Barangay ditoy siudad ti Baguio para iti panakatiliw dagiti aglablasing iti Anti-Road Obstruction (ARO) Order.
Sigun kenni Kagawad Cesar Peralta, agtultuloy ti panangimplementarda iti nasao a pammilin nangruna ta masakupan ti central business ti barangay dagitoy.
Dinakamatna nga innaldaw a nasurok iti lima a lugan ti matiltiliw a naglabsing iti ARO Order ken mabakbaklasan iti plaka, partikular sadiay Carantes Street.
Innayonna nga adda met latta dagiti lugan a saan a matiltiliw gaputa pumanawda no addan dagiti opisyal ti barangay nga agronda.
Sigun pay kenni Kag. Peralta, kaduan nga aglablasing iti ARO Order iti masakupan ti Session-Governor Pack Road Barangay ket dagiti residente iti dadduma a barangay nga agturturong kadagiti dadakkel a pasdek ditoy siudad.