Agtultuloy nga im-imbestigaran dagiti otoridad ti ipupusay ti agina a maatap a nagkettel iti bukod a biag babaen iti panagsabidong idiay Barangay Camburoy, Samboan, Cebu itay laeng nabiit.
Nasarakan ti bangkay ti ina ken ti 5-anyos nga anakna a lalaki iti uneg ti pagtaenganda iti nasao a lugar.
Maibasar iti inisyal nga imbestigasyon ti Samboan Police Station, adda ti nadagsen a parikut ti ina isut gapuna a nagkettel ken inramanna pay ti anakna babaen iti panaginom ti makasabidong a kemikal.
Iti interview ti Bombo Radyo kenni PCapt. Analiza Sarte, dadaulo ti Samboan Police Station, adda ti nakitada a suicide note a naglaon iti panagpakada.
Dinakamat ni PCapt. Sarte a sinukimatda nu adda ti foul play a napasamak ngem awan ti nakitada nga ebidensiya wenno pagilasinan a mampaneknek nga adda ti nangpapatay kadagiti saanen a nainaganan a biktima.
Patien met ti pamilya ti biktima a nagkettel iti bukodna a biag ti ina ken inramanna ti anakna gapu iti nabasada a surat.
Iti baet daytoy, agtultuloy latta ti naun-uneg nga imbestigasyon dagiti otoridad maipapan iti napasamak nga insidente.
