BAGUIO CITY – Naipaluspos ti P810-K nga indemnification fund kadagiti agtartaraken ti baboy iti probinsia ti Benguet a naapektaran iti outbreak ti African Swine Fever (ASF).
Maitunos daytoy iti Department of Agriculture Administrative Order No. 14, series of 2019 a nangibilin iti panakaipaay ti tulong pinansial kadagiti agtartaraken ti baboy a naapektaran iti ASF tapnu matulongan dagitoy manipud iti panakalugida ken maiyallukoy ti nasapa a panangireport kadagiti taraken a posible a nakaptan ti nasao a sakit.
Nagnumar iti nasao a pondo dagiti 27 a hog raisers iti Benguet, no sadino, nabayadan ti P5,000 ti tunggal taraken a baboy a naipasidong iti culling wenno pwersado a panagpatay.
Naamuan a dagiti nasao a hog raisers ket nagtaud iti munisipyo ti Itogon ken La Trinidad ken dumanon iti 162 a baboy ti taraken dagitoy a naipasidong iti culling idi napalabas a tawen.
