Siam nga agngayangay ti nangipila iti Certificate of Candidacy(COC)idiay Kibungan,Benguet idi kalman.
Buklen daytoy ti maysa a agngayangay iti kinamayor, maysa iti kinabise mayor, ken pito iti kinakonsehal.
Iti panakaiuman ti Bombo Radyo kenni Abelardo Lindawan Jr., Election Officer iti Commission on Elections-Kibungan, dagiti siam a nangipila iti panagngayangayda ket pasig a miembro iti Lakas CMB,maysa a political party.
Sigun kenni Lindawan Jr.,adda dagiti daduma a nangipakaammo kadakuada nu kaano dagitoy a mangipila iti COC, ken adda met dagiti daduma a saan a nagpaabiso.
Nupay kasta,agtultuloy latta ti panaguray da Lindawan Jr. ken daduma pay a personnel a nadutukan nga agbantay iti filing venue para iti isasangbay dagiti daduma pay nga agngayangay.
Kabayatanna,awan ti naobserbaran a nangipatungpal iti ritwal kadagiti napanen nangipila iti kandidaturada.
Iti sabali a bangir,awanen ti residente idiay Kibungan,Benguet iti nangipasimudaag a kayatda pay ti kumamakam para iti voter registration.
Sigun kenni Abelardo Lindawan Jr., Election Officer iti Commission on Elections-Kibungan, ammo dagiti residente a nagleppasen idi Lunes ti voter registration rason nga awanen nagturong iti opisina dagitoy tapno agparehistro.
Malaksid iti dayta,imbinglay ti opsiyal a nanglikaw dagitoy kadagiti nagduduma a babbarangay iti nasao a munsipyo tapno irehistro dagiti residente.
Iti agdama, pakabulanen a 10,416 ti bilang dagiti botante ken manamnama a mainayon pay ti 465 nga aplikante a naituding a maaprubaran ita a bulan.
Iti baet nga adu dagiti nadeactivate wenno naikkat iti listaan dagiti botante,kinuna ni Lindawan Jr. nga nasupusupan metlaeng daytoy dagiti baro a botante a nagparehistro.//Bombo Rob Dominguez
