BONTOC, MT.PROVINCE- Agtultuloy latta a maipatpatungpal ti information drive kadagiti umili idiay Bontoc, Mt.Province tapno maliklikan dagiti kaso ti uram.
Iti interview ti Bombo Radyo kenni Bontoc Mayor Jerome “Chagsen” Tudlong Jr., kinuna a nakailista ti Bureau of Fire Protection (BFP) – Bontoc ti tallo pulo ket maysa a kaso ti forest fire iti nasao a munisipyo.
Sigun kenkuana kaaduan kadagitoy ket gapu iti panagliway dagiti umili sadiay kadagiti nagdalusanda a ruot kadagiti gardenda, panangibilleng iti upos ti sigarilyo ken dadduma pay.
Gapu iti dayta, kinasarita ti nasao a mayor dagiti natataengan ken dagiti barangay officials idiay Bontoc Ili itay nabiit para iti pannakaipatungpal ti “Manerwap,” maysa a rain-calling ritual dagiti umili idiay Bontoc, Mt. Province iti panawen ti tikag tapno makiddaw ti panagtudo.
Kinuna a mamati dagitoy iti nasao a ritwal agsipud ta daytoy metlaeng ti sigud nga inar-aramidda idi panawen ti tikag.
Paset ti ritwal a “Manerwap” ti panangdanun kadagiti sagrado a bantay, panagkararag kenni Lumawig, panangidaton ti arak ken tabako kadagiti ancestors ken panagtukar ti gangsa.//Rosemarie Bulsao
