Impila ni House Speaker Martin Romualdiz ken dagiti innem a House leader ti gakat a mangisingasing iti innem a tawen a termino para kadagiti opisial ti barangay ken Sangguniang Kabataan, tapno masigurado ti panagtultuloy dagiti programa ken proyekto dagitoy.
Babaen iti House Bill No. 10747, maipaayan dagiti opisiales iti naan-anay a panawen nga agplano ken mangipatungpal iti long-term programs para iti pagsayaatan iti Barangay dagitoy.
Mainaig iti dayta, kinuna ni House Speaker Martin Romualdiz a ti pannakapaatiddog iti termino ket manglapped iti aniaman nga isyu ti eleksion a mabalin a manglapped kadagiti proyekto ken serbisio.
Malaksid iti dayta, maliklikan ti panakariribuk iti eleksion ken tapno ipamaymaysa dagiti opisiales ti serbisioda kadagiti barangay.
Kabayatanna, iti sidong ti nasao a gakat naikeddeng ti eleksion para iti Barangay intun maudi a lawas ti October 2029, kalpasan iti tunggal innem a tawen.
Maipalagip a naituding ti sumaruno nga eleksion ti barangay ken SK inton Disiembre 2025 kalpasan a nasuspende daytoy iti sumagmamano a daras.
