BAGUIO CITY – Pimmusay ti innem nga estudyante bayat a nadangran ti dua pay iti napasamak nga aksidente sadiay Sitio Bunga, Catengan, Besao, Mountain Province alas kwatro ti malem ti Abril 21.
Nabigbig dagiti pimmusay a da Rhema Sumingwa 18 yrs old, Merly Docyogen-17 yrs old, Hazel Solang-19 yrs old, Lendel Keith Alfonso-19 yrs old, Dalog Kawi Mangallay-19 yrs old ken Lip-aw Aligan-21 yrs old.
Nabigbig met dagiti nadangran a da Novielyn Sagantiyoc-18 yrs old ken Lander Maticyeg- 17 yrs old a residente ti Patiacan, Quirino Ilocos Sur.
Maibasar iti inisyal a report, natnag ti maysa a Green Tamaraw FX a naglaon kadagiti walo nga indibidual iti 100 a metro ti kaunegna a rangkis a nangitunda iti panakadadael ti lugan ken dagus nga ipupusay dagiti innem bayat a naitaray pay dagiti dua iti Besao Hospital para iti pannakataming dagitoy.
Naiyawid metten ti bangkay ni Sumingwa ken Docyogen iti pagtaenganda sadiay Catengan, Besao, Mountain Province bayat a naiturong met ti bangkay da Alfonso, Solang, Mangallay ken ni Aligan idiay Sitio Bunga, Catengan, Besao, Mountain Province ken maiyawid ita nga aldaw ti Abrl 22 sadiay Sitio Bab-asig, Patiacan, Quirino, Ilocos Sur.
Iti agdama, manarimaan paylaeng iti imbistigasyon dagiti otoridad iti rason ti aksidente .
