Inwaragawag ti National Bureau of Investigation (NBI) ti pannakakemmeg dagiti innem nga indibidual gapu iti panaglakoda iti posision ti gobierno, pakairamanan ti maysa a nangibaga a dagiti posision ket inyurnos ni First Lady Liza Araneta-Marcos.
Sigun iti National Bureau of Investigation (NBI), kinemmeg dagiti ahenteda ti innem nga indibidual gapu iti syndicated estafa ken panaglabsing ti Article Article 177 wenno “usurpation of authority or official functions” ti Revised Penal Code bayat ti entrapment operation iti Manila Hotel.
Ti operasion ket naipatungpal kalpasan a naipila ti reklamo iti Office of the Special Task Force and the Cybercrime Division itay kanikadua, nu sadinno adda ti agnagan ti Diane ti nangipaay iti maysa nga indibidual iti posision kas kameng ti Bangsamoro Parliament para iti P8 milion.
Impasigurado met ni Diane iti nagreklamo nga inyurnos ti first lady ti posision.
Kinunana a dagiti naballigi nga appointees ket agsapatada kuma idi kalman.
Kinuna ti NBI nga insayangkatda ti operasion kalpasan a naituding ti meeting iti nagbaetan ti nagreklamo ken ti grupo idi Enero 2, Huebes iti Manila Hotel.
