Pimmusay ti innem nga indibidual iti napasamak nga uram iti maysa a resort construction site idiay Busan City, South Korea idi kalman.
Maibasar iti report nga inruar ti Busan Gijang District Fire Department, nangrugi ti uram iti alas diez baente ti agsapa ken ket sumagmamano nga oras ti napalabas sakbay a naiddep wenno nasebseban dagiti bumbero.
Dumanon iti sangagasut a mangmangged ti puersado a naibakuit manipud iti lugar ti nakapasamakan ti uram bayat a sangapulo ket uppat nga indibidual ti masapul a maisalakan babaen ti helikopter gaputa na-corner ti pasdek a nauram.
Kalpasan a bimmaaw bassit ti uram, simrek dagiti bombero ken rescuers iti pasdek ket nasarakanda ti innem a tattao nga awan puotna.
Dagos a naitaray dagitoy iti ospital ngem naideklara a pimmusay.
Malaksid iti innem a pimmusay, duapulo ket lima nga indibidual ti naipadamag a nadangran.
Kabayatanna, bayat ti rescue ken firefighting operation iti uram, imbilin ni South Korean acting president Choi Sang-mok ti pannakaideploy dagiti amin a bakante a personnel ken equipment tapno saan a kumaro ti uram ken naan-anay a maiddep.
Iti agdama, agtultuloy paylaeng ti imbestigasion ti fire department iti nagtaudan ti uram, agraman ti panagbantayda iti intero a pasdek.
