Nakoronaan kas Miss Philippine Earth 2024 ni Irha Mel Alfeche, tubo ti Matanao sadiay Davao del Sur kalpasan ti naangay a grand coronation sadiay Talajag, Bukidnon idi kalman.
Ti 24-anyos a beauty queen ket naartapanna dagiti 28 a kandidato manipud kadagiti nagduduma a probinsiya iti pagilian a Pilipinas.
Kabayatanna, naideklara ni Feliz Clareianne Thea Solomon Recentes manipud Sindangan, Zamboanga del Norte kas Miss Philippines Air 2024; Samantha Dana Bug-os manipud Baco, Oriental Mindoro kas Miss Philippines Water 2024; Kia Labiano manipud Titay, Zamboanga Sibugay, kas Miss Philippines Fire 2024; ken ni Ira Patricia Malaluan manipud Batangas City kas Miss Philippines Eco Tourism 2024.
Maipalagip a ti Miss Philippine Earth 2023 ket ni Yllana Marie Aduana manipud Laguna.