Imbinglay ti militar ti Israel a posible a kumaro ti gubat iti “cross-border” gapu iti panaggaraw wenno panagpaputok ti Hezbollah manipod Lebanon.
Sigun kenni Israeli military spokesperson Rear Admiral Daniel Hagari, posible a lumawa pay ti gubat gapu iti ar-aramiden ti nasao a grupo ken posible a mangitunda iti nakaro a pannakadadael ti pagilian a Lebanon ken iti intero a rehion.
Ti Hezbollah a supsuportaran ti Iran ket nangiyuswat idi napalabas a lawas ti kadakkelan a panangipatayab ti rocket ken drones kontra iti Israeli military.
Gapu iti nakaro a panagsinnukat ti drones ken rockets iti dua a pagilian idi napalabas a lawas, naimatangan ti panagkapuy ti Hezbollah bayat a kinuna ti Israeli military a nakaaramidda iti sumagmamano a panangraut kontra iti nasao a grupo iti makin-abagatan a Lebanon.
Kabayatanna, agar-aramiden ti wagas ti Estados Unidos ken France tapno maurnos ti panagbubusor iti nagbeddengan ti Lebanon.
Sigun iti grupo a Hezbollah, ituloyda a mangipatayab ti rocket agingga nga isardeng ti Israel ti “military offensive” dagitoy idiay Gaza.
