BAGUIO CITY – Mababbabalaw ti kaawan aksion dagiti opisyales iti pakaseknan dagiti mannalon iti rehion, partikular dagiti nateng manipud China nga iligal a naiserrek ditoy pagilian.
Iti panaki-uman ti Bombo Radyo Baguio, impeksa ni Agot Balanoy, panakabagi ti League of Associations iti La Trinidad Vegetable Trading Areas ti panaka-upayda kadagiti opisyales iti lokalidad, nangruna ti kaawan aksion dagitoy.
Dinakamatna nga idi pay Hulyo ti napalabas a tawen ti panagririda ngem agingga ita ket awan ti aksion a naawat ti pakaseknanda malaksid laeng iti manarimaan a Senate hearing iti daytoy ken iti serye ti panagrebbek kadagiti pakaiduldulinan dagiti smuggled vegetables idi Disyembre ti napalabas a tawen.
Impettengna nga iti panawen ti sigud a kongresista ti Benguet ket adda a dagus ti aksion uray maminsan laeng ti panagriri dagiti mannalon.
Kukwestionaranna met ti saan a panangasikaso dagiti maseknan nga opisyales iti nasao a pakaseknan dagiti mannalon a nagiddanan pay iti panagngina unay dagiti abono.
Imbinglay pay ni Balanoy a mangipatulodda manen iti surat sadiay Senado mainaig iti agtultuloy a panagraira dagiti smuggled vegetables.
Dinakamatna a namin adu a daras a nagsuratda iti Central Office ti Department of Agriculture ken iti Bureau of Customs ngem awan met ti naaw-awatda a sungbat.
Iti baet daytoy, mangnamnama latta dagiti mannalon nga adda ti mangipangag iti arungaingda ken agaramid ti aksion tapnu matulongan dagitoy.
