BAGUIO CITY – Nangipaulog ti lokal a gobierno ti La Trinidad, Benguet iti kabarbaro a pammilin seknan iti pannakaipasidong ti munisipio iti extreme enhanced community quarantine (EECQ) a mangrugi inton bigat, Marso 30 aginggat Marso 31.
Inbilin ni Mayor Romeo Salda ti pannakaipasidong ti La Trinidad ti EECQ kalpasan a nairekord ti dua a kaso ti COVID 19 iti nasao a munisipio.
Maibasar iti kabarbaro a pammilin ti mayor, masapul a temporario a mairikep dagiti establisiemento a nagturongan ti dua nga indibidual a nagpositibo iti COVID 19.
Sigun iti mayor, babaen iti pannakairikep dagiti establisiemento ket maipasidong dagitoy iti inspeksion ken tapno makai-display manen dagitoy kadagiti lakoda.
Kabayatan ti dua nga aldaw nga EECQ ket mabalin nga aglukat dagiti sari-sari stores ken water refilling stations kadagiti babbarangay manipud alas nuebe ti agsapa aginggat ala una ti malem.
Maituloy ti immunan a pammilin a mairikep ti La Trinidad Vegetables Trading Post tapno maipasidong daytoy iti disinfection ngem naibilin ti pannakailukat ti Benguet Agri-Pinoy Trading Center (BAPTC) kabayatan ti EECQ.
Mairikep ti amin a checkpoints malaksid iti paset ti national highway manipud Shilan aginggat KM 3.
Maiserra met laeng ti amin a kalsada iti barangay ken probinsial pakairamanan dagiti alternatibo a ruta.
Mapalubusan met nga agbiahe ti amin a lugan nga addaan iti food lane pass manipud iti Department of Agriculture.
Maibasar pay iti pammilin, awan ti maipaay a travel pass kabayatan ti dua nga aldaw nga extreme enhanced community quarantine ken awan ti panagkolektar iti basura ita nga aldaw ken inton bigat.
