Agsagsaganan ti kabsat a babai ti dua a biktima ti EJK ti naglabas nga administrasion idiay The Hague, Netherlands para iti panagaplikarna a makipaset iti “trial” kontra kenni sigud a President Rodrigo Roa Duterte iti International Criminal Court (ICC).
Iti maysa a report, kinuna ti agnagan ti alyas “Mira” a dua a kabsatna ti kammali a nairaman iti iligal a droga ken naakusaran a bimmales kadagit otoridad bayat ti operasion dagiti kameng ti pulisia idi Mayo 2017.
Maibasar iti sangapulo ket innem a panid ti dokumento a naisubmitir iti ICC registry iti Pre-Trial Chamber I, napaliiwda nga addan ti tallo a konsultasionda iti nasurok a 200 representatives manipod iti nasurok a 2,000 a biktima ti EJK ken nasurok a 1,500 a pamilia.
Sigun iti pannakangiwat ti ICC a ni Fadi El Abdallah, ti konsultasyon ket saan a maipapan iti kaso ni Duterte para iti mapapati a “crimes against humanity.”
Inlawlawag ti nasao a pannakangiwat a saan nga amin a biktima ket maikonsidera kas “witness” wenno saksi.
Kinunana a saanda a namnamaen nga adu ti saksi a maiparang bayat ti “confirmation of charges” ni Duterte inton Setiembre.
Innayon pay ti nasao nga opisial nga agtalinaed a “confidential” ti pakabigbigan dagiti biktima.
