Temporaryo a naiparekep ti Kagaling river sadiay Mangi Hydro River, Hydro 2, Nangalisan, Tuba, Benguet kadagiti non-residents agingga inton Abril 20, 2025 tapno maliklikan dagiti anyaman nga insidente ita a Holy week.
Daytoy ket kalpasan ti panakalmes ni John Lloyd Runatay Bautista, 18-anyos ken residente sadiay San Cornelio, Caba, La Union idi Abril 17, 2025.
Maibasar iti imbestigasyon, kadua ti biktima ti innem a kakaduana a naglangoy iti karayan iti oras ti alas kwatro ti malem ti nasao nga aldaw kalpasan a nag-inomda iti dua a bote ti “2×2” nga arak.
Nupay kasta, kalpasan ti agarup maysa nga oras ket nalmes ti biktima gaputa saanna nga ammo nga aglangoy.
Dagus met a nagkiddaw dagiti kakaduana iti tulong kadagiti umili.
Naipaayan metlaeng ti biktima iti Cardiopulmonary Resuscitation wenno CPR ken naiturong daytoy sadiay Baguio General Hospital and Medical Center para iti pannakatamingna.
Nupay kasta, indeklara ti attending physician daytoy a dead on arrival no sadino naduktalan a ti rason ti ipupusayna ket gapu iti severe asphyxia secondary to drowning.