Mangipaay ti Estados Unidos iti kanayonan a $1 milion a pondo kas tulong iti Pilipinas kalpasan a dinadael ti bagyo a Pepito dagiti isla ti Luzon iti ngudo ti lawas, sigun kenni US Defense Secretary Lloyd Austin III.
Ni Austin ket adda ita iti Pilipinas para iti opisial a panagbisitana nu sadinno, nakipaset daytoy iti groundbreaking ceremony ti Combined Coordination Center in Camp Aguinaldo idiay Quezon City a mangpapigsa ken mangpasayaat ti panagtitinnulong ti puersa militar ti US ken Pilipinas.
Kagiddan ti seremonia, impablaakna ti nasao a gatad tapno matulungan dagiti naapektaran a Pilipino iti naglabas a bagyo ken kinunana a nakasagana dagiti militar dagitoy a mangipaay ti lifesaving assistance tapno makatulong iti surge aid kadagiti umili ti Pilipinas.
Ti $1 milion ket kanayunan iti impaayda a $5.5M iti Pilipinas babaen ti USAID.
Kabayatanna, indaton ti opisial ti Estados Unidos ti panakipagladingitna kadagiti biktima ti bagyo.
Sigun kenni Austin, idatonna ti panunot, kararag ken panakipagladingitna kadagiti amin a naapektaran ti naglabas a bagyo.
Babaen ti kanayonan a tulong manipud iti gobierno ti US, patien ti dua a pagilian nga agtultuloy ti nasingend a panagkaduada kadagiti sumaruno a tawen.
Immunan a nagpinnirma ni Austin ken ti Philippine counterpart Department of National Defense Secretary Gilberto Teodoro Jr. iti General Security of Military Information Agreement nga agserbi kas “framework” tapno mapasayaat ti panagsinnukat ti impormasion maipapan iti militar iti nagbaetan ti dua a pagilian.
