BAGUIO CITY – Nailista ti rehion Cordillera ti uppat a kanayonan a kaso ti COVID-19 idi kalman, June 11.
Kinumpirmar ni Abra Governor Joy Bernos ti maikalima a kaso ti COVID-19 sadiay Abra no sadino, daytoy ket maysa a 27-anyos a babai a nars sadiay
Licuan-Baay ngem residente ti Bucloc ken close contact ti maikapat a COVID-19 patient sadiay.
Kinunana nga awan ti sintomas ti maikalima a pasyente nga ita ket naka-quarantine ken maipasidong iti sabali manen a swab test para iti beripikasyon.
Nailista met ti Tabuk City, Kalinga ti maikadua nga imported case ti siudad iti COVID-19 no sadino, daytoy ket 51-anyos a lalaki, OFW sadiay Abu Dhabi ken residente ti Dagupan West.
Iti agdama ket naka-quarantine daytoy iti isolation unit ti Tabuk City kalpasan a rimwar ti positibo a resultana ita nga aldaw kalpasan a naipasidong iti swab test idi June 8.
Dumanon metten iti 17 ti kaso ti COVID-19 iti Benguet kalpasan a nanayonan daytoy iti dua ita nga aldaw.
Sigun kenni Buguias Mayor Ruben Tindaan, maysa kadagiti baro a kaso ket 30-anyos a lalaki a pulis a residente ti Betag, La Trinidad ngem agdama a nakadestino iti Camp Molintas sadiay Catlubong, Buguias.
Kinumpirmar met ni Itogon Mayor Victorio Palangdan ti maysa pay a baro a kaso ti COVID-19 no sadino, daytoy ket 54-anyos a lalaki a barangay tanod sadiay Barangay Dalupirip.
Kinunana nga awan met ti sintomas iti nasao a barangay tanod ken awanan ti travel history.
Gapu iti daytoy, maipasidong iti lockdown ti Camp Molintas ken ti Barangay Dalupirip para iti contact tracing ken iti panakaipatungpal dagiti kaskenan nga addang.
