Mangnamnama ti COMELEC-Baguio a manayunan pay dagiti bilang dagiti nangipila iti kandidaturana.
Iti interview ti Bombo Radyo kenni Atty. Atty. John Paul Martin, Election Officer ti Commission on Election-Baguio kinunana a sumagmamano paylaeng ti bilang dagiti nangipila iti kandidatura manipud nangrugi ti filing of Certificate of Candidacy idi Oktubre a uno agingga idi kalman iti siudad ti Baguio.
Kinunana a walo laeng ti nangipila iti kandidaturana idi laeng kalman.
Dagiti nangipila ket nagtaud iti nagduduma a partylist no sadino buklen daytoy da Sol Go, asawa ni Congressman Mark Go para iti kina-kongresista iti siudad ti Baguio, ken iti kinakonsehal a da incumbent barangay Abanao-Zandueta-Kayong-Chugumotek kagawad Atty. Standford Ang, incumbent City Councilor Atty.Betty Lourdes Tabanda, sigud a City Councilor Elaine Sembrano, sigud a City Councilor Joel Alangsab, ken media leader Edong Carta.
Gapu iti daytoy, pakabuklan ti tallo a kina-kongresista ti nangipila iti kandidatura bayat a walo met iti kina-konsehal.
Sigun kenni Atty. Martin adda metten dagiti sumagmamano a grupo ti nangi-schedule iti panangipila iti kandidaturada.
Nupay, nagpalagip kadagiti agngayangay a kandidato a nasaysayaat nga ipakaammo da kadakuada ti aldaw a panangipila dagitoy iti kandidatura da tapno maliklikan nga aggigiddan dagitoy para iti naannayas a filing of Certificate of Candidacy.
