BAGUIO CITY- Kidkiddawen ita ti maysa a grupo dagiti health workers ti pannakanayun ti sweldo dagitoy kagiddan ti pannakarambak ti National Health Workers’ Day ita nga aldaw.
Iti interview ti Bombo Radyo kenni Robert Trani Mendoza, Alliance of Health Workers – National President, kinunana nga agtaltalinaed latta a nababa ti salary grade dagiti health workers ken saan metlaeng a maipapaay ti umno a benepisyo dagitoy.
Sigun kenkuana, saan nga umdas ti sweldo dagitoy iti inaldaw a pagkasapulan ken dagiti dadduma a mabayadan.
Malaksid iti daytoy, kidkiddawenda pay a maisardeng ti contractualization iti pagilian a Pilipinas agsipud ta biag ti napateg no sadino kasapulan nga agbalin a priyoridad ti gobyerno ti pannakaipaay ti plantilla position kadakuada.
Innayonna pay a nakalkaldaang ti kasasaad dagiti health workers isu’t gapuna a mapilitan dagitoy nga agtrabaho iti dadduma a pagilian, bayat a dagiti dadduma ket nagtrabahoda kadagiti Business process outsourcing (BPO), wenno iti militar tapno dakdakkel ti sweldo dagitoy.
Nupay kasta, patien ni Mendoza a kabaelan a nayunan ti gobyerno ti sweldo dagiti health workers kasta metlaeng ti panangnayunda iti sweldo dagiti miembro dagiti pulis ken dagiti soldado.
