BAGUIO CITY – Nailista ti Cordillera Region ti kangatuan a bilang dagiti estudyante ken personnel dagiti Higher Education Institutions (HEIs) iti pagilian a nabakunaan kontra iti COVID-19.
Maibasar iti datus, 91% wenno agaruo 7,600 manipod iti nasurok 8,300 nga HEIs personnel iti Cordillera ti nabakunaan bayat a 47% wenno nasurok met iti 52,600 manipod iti agarup 111,800 ti nabakunaan kadagiti estudyante.
Kasaruno metlaeng daytoy ti impatungpal ti CHED-Cordillera nga agresibo a kampanya ti COVID-19 vaccination ken ti kallepas a Higher Education Institutions Vaccination week a naipatungpal idi November 4 agingga 11 ti agdama a bulan.
Sigun kenni CHED-Cordillera COVID-19 Vaccination Focal Person Dr. Jimmy Catanes, agtultuloy latta ti vaccination campaign para kadagiti estudyante iti HEIs babaen ti pannakitinulong dagiti lokal a gobyerno iti rehion.
Kiniddawda metlaeng ti tulong dagiti organisasyon dagiti estudyante para iti pannakapapigsa ti COVID-19 information drive ken vaccination rollout kadagiti estudyante.
Inlawlawagna a dakkel nga impluwensia dagiti student leaders iti panaka-allukoy dagiti kakadwada nga estudyante tapnu agpabakuna dagitoy nangruna dagiti addaan ti panagdua-dua iti bakuna kontra iti COVID-19.
Kabayatanna, sumagmamano pay kadagiti pagadalan ti kolehio iti rehion ti manamama a mangisayangkat ti panagbakuna kontra iti COVID-19 agingga inton Biyernes, November 19.
