Manarimaan itan ti panangisimpa dagiti kameng iti pulisya kadagiti dokumento tapno maipila ti kaso kontra iti maysa a suspect a karaman iti napasamak a pammaltog idiay Barangay Nagtupacan, Lagangilang, Abra idi April 7.
Ti nasao nga insidente ket nangitunda iti ipupusay ni Louie Salvador Claro, kapitan iti Barangay Nagtupacan Lagangilang Abra, ken ni Manzano Bersalona Agdalpen Jr.,kandidato met iti kina-Sangguniang Bayan iti isu metlaeng a munsipyo.
Maibasar iti imbestigasyon, immuna a napasamak ti dinnanog iti nagbaetan da Agdalpen ken ti kagawad a ni Rommel Apolinar .
Rumrumwar a bayat ti panagkampanya ni Agdalpen idiay Barangay Nagtupacan ket nairana nga adda sadiay ni Apolinar a mapapati a tagasuporta iti sabali a partido.
Iti panakiuman iti Bombo Radyo ken ni Police Lieutenant Colonel Daniel Pel-Ey, Public Information Officer ti Abra Police Provincial Office, inasitgan ni Agdalpen ni Apolinar ken dinanogna ti rupa daytoy.
Gapu iti dayta,nagkamang ni Apolinar ken ni Kapitan Claro ken impadamagna ti napasamak rason a nagkuyog dagitoy a nagturong iti nakapasamakan ti insidente.
Idi nakasangpet da Kagawad Apolinar ken Kapitan Claro iti nasao a lugar, dinanog manen ni Agdalpen ni Apolinar rason tapno sumubbot met daytoy.
Kasaruno dayta, inasot ni Agdalpen ti paltog nga imetna ken ginandatna nga ipaltog kenni Apolinar ngem saan a pimtok daytoy.
Nupay katsa, pimtok daytoy idi impaltogna kenni Kapitan Claro ken pinasarunwan pay a pinaltugan ti kadwana metlaeng a driver.
Kalpasan dayta, ni Agdalpen ket pinaltugan met ti saan pay nabigbig nga indibidwal.
Naitaray pay iti pagagasan da Claro ken Agdalpen ngem agpada dagitoy a naideklara a Dead on Arrival.
Sigun kenni Pel-Ey, naarestar ti driver ni Agdalpen a karaman a nangpaltog kenni Claro gapu ta simmurot daytoy iti pagagasan a nakaitarayan ti sangguniang bayan candidate.
Kabayatanna, manarimaan paylaeng met ti panakiuman dagiti otoridad kadagiti bumarangay iti Nagtupacan tapno makaala dagitoy iti kanayonan nga impormasyon para iti panakabigbig ti nangpaltog kenni Agdalpen.//Bombo Rob Dominguez
