Ngimmato iti 745% ti kaso iti Pertussis iti Rehion Cordillera idi 2024 nu idilig iti rekord idi 2023.
Sigun kenni Victoria Malicdan, Nurse V iti Department of Health-Center for Health Development-Cordillera, dumanon iti 186 ti nailista a kaso ti Pertussis idi napalabas a tawen, nangatngato ngem iti 22 idi 2023.
Malaksid iti dayta, adda iti nailista a tallo nga indibidwal a pimmsuay gapu iti nasao a sakit idi 2024, dua kadagitoy ket residente iti Baguio City bayat a ti maysa ket residente met iti Probinsya iti Ifugao.
Sigun kenni Malicdan, 51% kadagiti naapektaran iti nasao a sakit ket lallaki.
Agay-ayam met iti nagbaetan iti Bente nga aldaw agingga iti 64 a tawen ti edad dagiti naapektaran.
Dagiti lugar iti Rehion Cordillera a nakailista iti Pertussis idi 2024 ket pakairamanan iti Apayao a nakailista iti innem a kaso; Baguio City a 113; Benguet a 47; Ifugao a 2;Kalinga a 7; ken idiay Mt. Province nga 11.
Awan met ti nailista a kaso iti Probinsya iti Abra iti Pertussis iti kapada metlaeng a tawen.
Mainaig iti dayta, 118 kadagiti naapektaran iti nadakamat a sakit ket nakaawaten iti bakuna.
Ti Pertussis ket maysa a klase iti uyek wenno ti maaw-awagan a whooping cough wenno ti 100-day cough nu sadino, dagiti agsagsagaba iti daytoy ket mabalin a makapasar iti runny nose, gurigor, ken mild cough.//Bombo Genzel Depayso
