Impetteng ni Senator Risa Hontiveros a masapol pay nga ikaro ni suspended Bamban, Tarlac Mayor Alice Guo ti kasona iti pagilian a Pilipinas sakbay a maideport daytoy apaman a mapaneknekan ti korte dagiti kaso a naipila kontra kenkuana.
Sigun kenni Senator Hontiveros, saan a mabalin a maaramid a free-pass ti panakaideport ni Guo nu sadino, kasapulanna a sangwen nga umuna ti pagbanagan ti panaglabsingna iti linteg ti Pilipinas.
Maipalagip a sumangsango ni Guo ken daduma pay nga indibidwal iti kaso nga adda pakainaiganna iti human trafficking a maibilbilang kas maysa kadagiti saan a mapiansaan a panaglabsing iti pagilian.
Malaksid iti dayta panggep pay ti Office of the Solicitor General(OSG) a mangipila ti “quo warrant case” kontra kenni Guo kalpasan nga in-endorso ti Philippine Statistics Authority(PSA) ti panangkanselar daytoy iti birth registration ti suspendido nga opisyal.
Innayon ni Senator Hontiveros a ti panakakanselar iti birth certificate ni Guo ti kakarwan a kaso a posible a sangwen daytoy nu sadino, mabalin nga ad-adda pay daytoy a dumagsen nu mapaneknekan ti korte a nangtakaw daytoy ti pakabigbigan ti maysa a Pilipina tapno makapagserbi kas maysa nga opisyal ti gobyerno.
