Bimmaba ti kaso ti dengue iti probinsya iti Benguet manipud week 31 ita a bulan.
Iti pannakiuman ti Bombo Radyo kenni Public Health Programs Head Dr. Cham Bacuso, Medical Specialist 1,kinunana makatawenen a bambantayanda ti nasao a sakit rason bimmaba daytoy.
Nupay kasta, nangatngato latta ti datos dagitoy manipud enero agingga setyembre baente uno, iti agdama a tawen no sadino dumanon daytoy iti 7898 no idilig iti datos a 1323 idi napalabas a tawen.
Gapu iti daytoy, dakkel ti ngimmatuanna a dumanon iti 497% a nangatngato no idilig idi napalabas a tawen iti kapada a period.
Sigun kenni Dr. Bacuso, dagiti ngimmato iti percentage-na gapu iti nasao a kaso ket ti munisipyo ti Tuba a 1612%, Kabayan a 1053%, ken Bokod a 720% ti ngimmatuanna.
Nupay kasta, agtaltalinaed latta ti munisipyo ti La Trinidad nga addaan iti kaaduan a kaso a dumanon iti 2382 a kaso, sarunuen ti munisipyo ti Itogon 1007 ken Kabayan a 865 a kaso.
Dagiti met kaaduan a natamaan iti daytoy ket dagiti agtawen iti sangapulo aginga sangapulo ket uppat.
Malaksid iti dayta,ngimmato pay ti casualties gapu iti dengue a dumanon iti sangapulo ket dua nangatngato no idilig iti dua laeng a casualties idi napalabas a tawen.
Kinuna ni Dr. Bacuso a kaaduan kadagiti pimmusay ket manipud iti munisipyo iti La Trinidad a dumanon iti pito, dua met iti Bokod, dua iti munisipyo ti Tuba ken maysa idiay Tublay.
