BAGUIO CITY – Ngimmato iti iti 548% ti kaso ti hand, foot and mouth disease (HFMD) iti rehiyon Cordillera.
Sigun kenni Department of Health – Cordillera senior health officer Karen Lonogan, nakailistada iti 259 a kaso ti HFMD ita a tawen no idilig iti 40 a kaso ti HFMD iti kapada a panawen idi napalabas a tawen.
Kinunana nga intunda daytoy ti killaat a panagbaliw-baliw iti sasaaden ti panawen ditoy rehiyon.
Inlawlawagna met a dagiti nasao a kaso ti HFMD ket saan a kapada dagiti kaso ti HFMD nga agtataud met kadagiti baboy.
Sigun kenkuana, ti HFMD ditoy rehiyon ket mild form ti maka-akar nga entero-virus infection a kadawyan kadagiti ubbing nga addaan sintomas a mouth sores ken rashes iti ima ken saka.
Nupay kasta, nainget met ti panangwanawanda iti severe form wenno nakaro a kita ti entero-virus 71 a mabalin a mangitunda iti neurological signs and symptoms a mangitunda iti ipupusay.
Dinakamat ni Lonogan a ti Mountain Province ti nakailista iti kaaduan a kaso ti HFMD partikular sadiay Paracelis a sinaruno ti Baguio City partikular sadiay San Roque Barangay.
Gapu iti daytoy, ipalpalagipna manen iti publiko ti kanayon a panag-ugas iti ima a kangrunaan nga addang kontra kadagiti virus.
