BAGUIO CITY – Dumanon iti agarup 600 ti agsagsagaba iti sakit nga human immunodeficiency virus (HIV) ditoy siudad ti Baguio.
Iti interview ti Bombo Radyo kenni Dr. Celia Flor Brillantes, City Health Officer, tunggal tawen a ngumatngato ti bilang ti nasao a sakit.
Innayona nga alarming ti bilang ti kaso ti nasao a sakit nangruna kadagiti lallaki nu sadino ad-adda a papapigsaenda ti panangprotektar iti daduma pay nga men who have sex with men (MSM) seknan iti nasao a virus.
Inaklon ni Dra. Brillantes nga awan ti monitoring da iti men who have sex with men (MSM) ngem ar-aramidenda ti kabaelanda tapno ma-reach out dagiti organisasyon nga addaan ti miembro a men who have sex with men (MSM).
Inlawlawagna a maysa a factor ti social and behavioral problem iti panaglaban iti nasao a sakit iti baet ti napintas nga information dissemination dagitoy.
Kinunana met nga agpopokus da ita iti panangipaay ti impormasyon kadagiti agtutubo para iti panakaammo dagitoy maipapan iti nasao a behavior.
Namnamaenda pay nga epektibo ti panakaipaay ti treatment kadagitoy tapno saan pay nga agwaras ti nasao a virus iti daduma nga indibidual.
Iti sabali a bangir, maipatungpal ti Aids Candlelight Memorial event sadiay Burnham Lake inton Mayo 10, iti agdama a tawen.
Panggep ti aktibidad a lagipen dagiti pimmusay iti nasao sakit, dagiti naglabasan dagitoy kasta met nga ipakaammo dagiti naaramidan dagitoy bayat ti disease process da tapno ad-adda a maawatan iti publiko.
Nu sadino, agbalin a pagsarmingan ken pag-adalan ti kapadasan da ken manayonan pay ti panakaammo iti publiko seknan iti panangliklik iti nasao a virus.
Agpalpalagip met ni Dr. Celia Flor Brillantes nga ad-adda a suportaran ken makikaykaysa iti panaglaban iti HIV babaen iti panangpatalinaed a natalged iti bagi ken panagtungpal kadagiti palagip ken impormasyon nga inisyatiba ti nasao nga opisina.
Kabayatanna, kasapulan ti panakaipasdek ti kanayonan pay a treatment hub gapu ta ngumatngato ti kaso ti nasao a sakit iti rehiyon Cordillera.//Bombo Marinel Rodrigo
