BAGUIO CITY – Nailista ti killaat a panagngato ti kaso ti kamuras ditoy rehiyon Cordillera ita a tawen.
Maibasar iti datus ti Center for Health Development ti Department of Health-Cordillera manipud Enero a uno agingga ita a bulan ti Setyembre ket nailistan ti 985 a kaso ti kamuras nga addaan uppat nga ipupusay.
Nangatngato ti nasao a bilang no idilig iti 194 a pakabulan a kaso ti kamuras iti rehiyon idi napalabas a tawen nga awanan ti nailista a kaso ti ipupusay.
Inaklon met ni Dr. Mary Crist Jamora, pediatric infectious disease specialist ti Baguio General Hospital and Medical Center nga adda latta ti panagbuteng dagiti nagannak iti rehiyon a mangipabakuna iti annak dagitoy.
Innayonna a nasken a maituloy ti kampanya tapnu maisubli ti panagtalek dagiti nagannak iti immunization vaccinations gaputa mabalin met a malapdan ti kamuras la ketdi maaramid dagiti nasapsapa nga addang kontra iti nasao a sakit.
