Bimmaba iti 20.62% ti bilang ti kaso ti violence against children iti rehiyon Cordillera.
Sigun kenni PLtCol. Carolina F. Lacuata, Chief Public Information Officer ti Police Regional Office Cordillera, dumanon iti 281 a kaso ti violence against children ti nailista iti amin a probinsya ti Cordillera manipud idi bulan ti Enero agingga Oktubre.
Nababbaba daytoy nu idilig idi napalabas a tawen a dumanon iti 354 a kaso iti kapada a reporting period.
Kinuna ni PLtCol. Lacuata a manipud iti 281 a kaso iti rehiyon Cordillera, 84 a kaso ti nailista iti siyudad ti Baguio nu sadino daytoy ti addaan iti kangatuan a bilang ti nasao a kaso.
Sarunuen daytoy ti probinsya ti Benguet a nga addaan iti 67 a kaso; probinsya ti Abra a 32 a kaso; probinsya ti Ifugao a 31 a kaso; probinsya ti Kalinga a 29 a kaso, ken probinsya ti Mt. Province ken Apayao a nakailista iti sag-19 a kaso.
Innayon ni Lacuata a babaen iti panagregget dagiti nagduduma a kameng ti pulisya ket immadu ti bilang dagiti biktima a maalallukoy a mangipila iti kaso kontra kadagiti perpetrators wenno abusers dagitoy.
Impetteng met ti nasao nga opisyal a saanda a sumardeng kadagiti inisyatiba dagitoy a pakairamanan ti women and children’s protection desks ken ti panakipagkaykaysa dagitoy kadagiti pagadalan ken lokal a gobyerno iti laksid a bimmaba ti kaso ti violence against children.
