Sino ti mangipagarup nga adda ti maysa nga Igorota a maka-addang iti nalatak nga international talent show competition?
Ni Riva Shayne Altiga Martes-Lee manipud Dalicno, Itogon, Benguet ket nag-audition iti America’s Got Talent idi laeng Enero 24, 2026.
Imbinglayna daytoy iti social media accountna a nakaawat met iti pammadayaw manipud iti publiko.
Ni Riva kadwana ti pamilya ket nagturong idiay Canada sangapulo ket innem a tawenen ti napalabas babaen iti oportunidad a naipaay iti amana.
Tawen 2020, immakar daytoy idiay California, United States nu sadino ditoyna metten a binukel ti bukodna a pamilya.
Iti baet dagiti karit kas iti panagbalinna nga ina a nakaapektar iti bosesna, saan a nagbalin a tubeng daytoy tapno padasenna a makipaset iti American talent show competition a nabayag a buybuyaenna kadwana ti pamilya.
Ti pannakipaset ni Riva iti nasao a kompetisyon ket saan laeng a para iti bukodna a bagi nu di ket tapno ipakitana kadagiti annakna a saan a naladaw ti agarapaap.
Malaksid iti daytoy, kayatna metlaeng nga ipakita iti sangalubongan ti kultura dagiti Igorot a malaksid iti kinalaing dagitoy nga agkanta, adda metlaeng ti panagayatda iti country music.//via Bombo Cara Sacyaten
