Naituding a talantanen ti Land Transportation Franchising and Regulatory Board (LTFRB) inton Pebrero 19 ti kidkiddawen dagiti transport group a mapagbalin a P15 ti minimum fare kadagiti pampasahero a jeep.
Sigun kenni LTFRB Technical Division Head Joel Bolano, ti nasao a petisyon ket naipila idi pay 2023.
Maipalagip nga idi Oktobre 2023 ket inaprubaran ti LTFRB ti P1 a provisional increase iti minimum fare kadagiti pampasahero a jeep.
Gapu iti daytoy, ti sigud a P12 a minimum fare kadagiti traditional jeep ket napagbalin a P13 bayat a ti sigud a P14 a minimum fare kadagiti modern jeep ket nagbalin a P15.
Impetteng met ni Bolano a ti makidkiddaw a P15 a minimum fare kadagiti pampasahero a jeep ket adalen a nalaing ti LTFRB.
Kinunana a karaman kadagiti ikonsiderada ti panagngato ti presyo dagiti produkto a petrolyo, ti panagngato ti presyo dagiti gagatangen ken ti epekto met ti ekonomiya iti publiko.
