BAGUIO CITY- Naituding nga agsasarita ita nga aldaw ti transport group iti Cordillera ken ti Land Transportation Franchising and Regulatory Board tapno madesisyonan ti petisyon a maipangato ti plete dagiti pasahero iti P5 agingga P6.
Sigun kenni Pat Evangelista, presidente ti asosasyon dagiti transport group iti Cordillera ken Region 1, mangnamnama dagitoy nga ipangag ti LTFRB ti kiddaw dagitoy nangruna ta ngimmato manen ti presyo ti petrolyo mangrugi ita nga aldaw.
Immuna metten nga impeksa ni Evangelista a nu bassit man ti patgan ti LTFRB a ngumatoan ti plete ket pagyamananda latta daytoy.
Nupay kasta, impaganetgetna nga iti kanito nga awan ti ngumatoan ti plete ket posible nga ad-ado pay a drivers ti saanen nga agpasada nangruna ta agpangpangta a ngumato ti presyo ti tunggal litro ti petrolyo iti agingga P100.
Sigun kenni Evangelista, 30% agingga 40% laeng kadagiti drivers iti rehiyon ti agpaspasada iti agdama isut gapuna nga agkidkiddaw daytoy ti despensar iti publiko nu maobserbaran a bassit dagiti agbibiahe a parapasahero a lugan.
